சமதர்ம சிந்தனையில் கவலையில்லாத் தத்துவம்

பேருந்து
பெரிய உந்து
தானியங்கி அல்ல
தனையன் பெயரிலிருந்தாலும்
தனியனுக்கும் சொந்தம் அல்ல

கால அட்டவணை உண்டு
காலம் தாழ்த்தலும் உண்டு
மகளிருக்கு தனி வண்டி
அதுகூட
மண்ணில்தான் ஓடும் வண்டி

அமர இருக்கை உண்டு
நிற்க இடமும் உண்டு
தொங்க படியும் உண்டு
கூரை சாகசமும் உண்டு

உருவாகும்போதே
கண்ணாடி அணிந்தாலும்
இளமையிலேயே முதுமை வந்தாலும்
ஒப்பனை அணிந்து
கற்பனை கலந்து
கவரும் வண்டி

கிராமம் பார்த்தாலும்
நகரம் பார்த்தாலும்
குமரி ஏறினாலும்
கிழவி ஏறினாலும்
பெட்ரோல் ஏறினாலும்
சாராயம் ஏறினாலும்
போதை ஏறாத வண்டி

இளமை பொங்கி நின்றாலும்
எரிபொருள்
நிறம்பி இருந்தாலும்
நடுசாலையில்
நின்று தொலைக்கும் வண்டி
பின்னழகில் கைவைத்து
முன்னோக்கி தள்ளினால்
தானே நகரும் வண்டி

ஓட்டுனர் மாறினாலும்
நடத்துநர் மாறினாலும்
பயணிகள் மாறினாலும்
பாதைகள் மாறினாலும்
கவலை கொள்ளா வண்டி